Exposición 'Liáns. Luces outonais' no Centro de Documentación Ambiental

A nosa biblioteca e centro de documentación ambiental acolle na súa sede, as antigas cabalarizas do Pazo de Lóngora, a  exposición 'Liáns. Luces outonais', do fotógrafo Víctor Hermida Valeiro,  unha serie de fotografías do parque forestal de Liáns e a súa contorna. A mostra pode visitarse na pranta baixa da biblioteca   do 14 de decembro de 2023 ao 29 de febreiro de 2024.

A exposición

A exposición componse de 16 fotografías en branco e negro tomadas este mesmo outono no parque forestal de Liáns, coñecido como 'Bosque dos Veciños' e situado no Concello de Oleiros. Inaugurado no ano 2009, conta con pasarelas para camiñar entre as súas árbores con pequenos rincóns para a lectura ou sentarse a escoitar os cantos das aves e da natureza. Na súa contorna atópase a igrexa de Santa Eulalia de Liáns e o Pazo de Lóngora, elementos patrimoniais incluidos na serie para completar a colección. Todas as imaxes foron realizadas cunha cámara Nikon D610, cun único obxectivo de 35mm e un filtro de densidade neutra (ND4).

Sobre o fotógrafo

Dende que  Victor Hermida  se aficionou á fotografía, forxouse un camiño amoldando a súa técnica cara buscar unha especial emotividade nos espazos verdes urbanos da súa contorna. A Coruña e arredores representan unha gran oportunidade neste aspecto xa que ofrece unha ampla variedade de xardíns, parques e, por suposto,unha extensa líña de costa. Ademáis, Liáns representa todo un estímulo para o autor,como mostra no seu libro autopublicado Liáns. Memoria perdida e sendo esta a segunda vez que expón nesta parroquia oleirense; esta vez si, con imaxes da zona.

A exposición 'Liáns. Luces outonais' pode visitarse en   horario de luns a xoves, de 10 a 14 h. e de 16 a 19 h., e venres de 9 a 14 h. (excepto festivos).