Presentación do libro 'A saga das curandeiras' de Marisa Castro

A recoñecida bióloga e micóloga galega,  Marisa Castro,  presenta na nosa biblioteca e centro de documentación ambiental a súa primeira novela,  A saga das curandeiras  (Hércules de Edicións), unha biografía ficticia que nos achega a Rosalía Carcedo, unha curandeira galega a través de cuxa vida nos convida a facer unha viaxe durante a primeira metade do do século XX, desde a súa Galicia natal, pasando polo Madrid da República e da Guerra Civil, ata a aldea de orixe á que volveu durante a ditadura. Alí, a personaxe de Rosalía, baseado na sabedoría dos antepasados da autora e dalgunhas curandeiras ás que visitou, continúa aplicando o seu coñecemento dos remedios naturais, a pesar da incomprensión e a incredulidade dos que a rodeaban.   A trama permite coñecer a relación das curandeiras coa poboación e coas autoridades civís e relixiosas, ademáis de aproximarnos ao uso das herbas e dos cogomelos, tando con fins curativos como máxicos, neste mundo críptico e infravalorado das meigas galegas.

Sobre a autora:

Marisa Castro Cerceda (Lugo, 1955), membro dunha saga de curandeiros, ata os 25 anos foi labrega como os seus pais.  Tivo a sorte de estudar na universidade e deixou que esta pasara por ela.  É micóloga, doutora en Ciencias Biolóxicas cun traballo relacionado cos cogomelos, e durante máis de 30 anos foi profesora da Universidade de Vigo, onde impartiu Botánica e dirixiu case unha decena de teses doutourais.  É socia fundadora da empresa MycoGalicia Plantae, con membros da súa equipa de investigación. 

Se a súa primeira profesión é a de docente, a segunda, sen dúbida, é a de divulgadora científica.  Marisa é ecoloxista, amante da naturaleza e defensora da liberdade feminina, especialmente na figura da muller rural galega.  É autora de máis dunha centena de traballos de investigación e de máis de 25 libros de divulgación relacionados cos cogomelos, as plantas e as árbores. 

O acto de presentación terá terá lugar o   vindeiro xoves, 27 de abril, ás 19 horas,   nas antigas cabalarizas do  Pazo de Lóngora. Acompañará á autora a Profesora Titular de Botánica da Universidade da Coruña,   Elvira Sauquillo.

As   prazas son limitadas,   polo que agradecemos confirmar asistencia no seguinte     FORMULARIO