Test de Biodiversidade

O encoro de Cecebre está situado na confluencia do Río Mero e o seu principal afluente, o Barcés, actualmente é un dos humidais de maior interese de Galicia. Construíuse en 1975 coa finalidade de abastecer a cidade da Coruña e parte da súa área metropolitana de auga. Presenta un elevado grao de naturalidade e unha notable beleza paisaxística motivo polo cal está incluído na Rede Natura 2000 e declarado pola Comunidade Autónoma de Galicia como LIC, Lugar de Interés Comunitario. A súa vexetación de ribeira (castaños, carballos, salgueiros, ameneiros, bidueiros, etc) moita dela anegada, serven de hábitat a numerosas especies de aves como garzas, cormoráns, águias peixeiras, miñatos, ánades, curuxas, etc, acompañados de outras especies de réptiles, anfibios e insectos, etc.

O Test de Biodiversidade é unha convocatoria dirixida a toda a cidadanía interesada en coñecer a diversidade paisaxística e natural do encoro. O obxectivo desta xornada é realizar fotografías da súa flora, fauna, paisaxe... para posteriormente subilas á plataforma dixital Biodiversidad Virtual ( http://www.biodiversidadvirtual.org/) onde un grupo de expertos categoriza e clasifica dita información.

Esta actividade forma parte do III Congreso Natureza e Imaxen organizado polo CEIDA co patrocinio do Consorcio das Mariñas. Descargar programa completo do congreso.