Día das Bibliotecas: xornada de portas abertas + presentación de libro Contra Vento e Marea

Cada 24 de outubro o Ministerio de Cultura, a través da Dirección General del Libro, del Cómic y de la Lectura, impulsa a celebración do   Día das Bibliotecas,   espazos abertos e "aptos para todos os públicos" que este 2024 leva o lema   'Por un fututuro sostible'.  A través das súas coleccións, servizos e actividades, as bibliotecas constribúen a unha sociedade mellor informada, máis igualitaria, solidaria e xusta, consciente da necesidade de levar un modo de vida sostible como compromiso coas xeracións futuras. Todas elas, por tanto, desempleñan un papel fundamental na consecución dos Obxectivos de Desenvolvemento Sostible e da Axenda 2023.

Con motivo desta celebración, o CEIDA levará a cabo o vindeiro   xoves, 24 de outubro,   na súa biblioteca e centro de documentación ambiental dúas actividades:

•  Xornada de portas abertas ao Centro de Documentación Ambiental Domingo Quiroga: presentación e visita.
  • De 18 a 19 horas.
  • A xornada pretende dar a coñecer o movemento das Bibliotecas Verdes, así como a colección, servizos e actividades que desenvolve este servizo de documentación ambiental do CEIDA, ubicado actualmente nas antigas cabalarizas do Pazo de Lóngora. Este centro de documentación e biblioteca verde está aberta a todo tipo de públicos, desde persoal técnico especializado, ata público familiar. Achégate e coñece mellor este espazo e todo o que pode ofrecerte!

• Presentación do libro 'Contra Vento e Marea. O ciclo da Vida no Monumento Natural Costa Dexo-Serantes'.​
  • De 19 a 20.30 horas.
  • Sinopse do libro: Declarada no ano 2000 monumento natural pola Xunta e recoñecida pola UNESCO como zona núcleo da Reserva de Biosfera Mariñas Coruñesas e Terras do Mandeo, a costa de Dexo-Serantes é terra e é mar. Nesta fronteira entre ambos os mundos preséntase ante a nosa vista a relación harmoniosa entre o salgado e o terrestre, unha combinación íntima da que xorde un escenario ante o que fascinarnos e en cuxo coñecemento e respecto afondar. Da man do corvo mariño cristado, cuxa poboación é aquí a máis numerosa da costa peninsular ibérica, imos coñecendo ao longo dos doce meses toda a diversidade humana e natural que se desprega nos 12 km de costa que conforman este arco mariñán: dende os labores de pesca e as pegadas da cultura castrexa, ata as numerosas especies que acompañan o corvo, como sapos parteiros e ras das veigas pola parte dos anfibios; paíños europeos, chascos e andoriñóns, pola das aves; ou queirogas e toxos pola banda do reino vexetal.
  • Participan:
    • ​Carlos Vales  (coordinador da publicación). Director do CEIDA. Catedrático de Bioloxía e Xeoloxía. Membro da Unión Internacional para a Conservación da Natureza (UICN) e asesor científico da Rede de Reservas de Biosfera de Galicia.
    • Sergio París  (autor dos textos). Forma parte do equipo de Educación Ambiental do CEIDA. Enxeñeiro técnico forestal e Máster en Espazos Naturais Protexidos, é membro da Sociedade Galega de Ornitoloxía, onde exerceu o labor de secretario. Gran coñecedor das aves e do medio natural do golfo Ártabro e, nomeadamente, da costa de Dexo-Serantes, sobre o que ten participado en diversas publicacións de carácter científico e divulgativo.
    • José Arcas  (ilustrador). Artista autodidacta de natureza, debuxa profesionalmente dende hai uns vinte anos, con participación en numerosas exposicións, tanto individuais coma colectivas. Doutor en Ciencias Biolóxicas pola Universidade de Vigo, ten publicado artigos científicos e divulgativos en varias revistas especializadas. Director artístico da revista  El Ecoturista.  Ilustrou e escribiu os libros Caderno de Campo das Illas Cíes (Catro Ventos), Viches iso? Un singular percorrido pola vida das aves invisibles (Galaxia) e Alexandrinus, cuaderno de campo de una limícola amenazada (Círculo Rojo).

Ambas actividadades terán lugar na sede da biblioteca e centro de documentación ambiental: Antigas cabalarizas do Pazo de Lóngora. Rúa Casares Quiroga, 29. Liáns (Oleiros).

RESERVA DE PRAZAS:   como o aforo é limitado, agradécese confirmar asistencia a través do formulario ou no teléfono 981 630 618.