Obradoiro Poesía e natureza. 'O zunido do poema'

Este obradoiro é unha aproximación a aquela poesía na que a natureza ten un papel protagonista. Para iso, apoiarémonos na obra dos poetas Mary Oliver, Alice Oswald e Seamus Heaney, tres escritores cun fortísimo vencello coa natureza ao longo da súa obra. Trataremos de explorar as distintas voces e achegas de cada un deles para, nun segundo momento, abordar a propia escrita.

O obxectivo do taller é, por tanto, procurar as chaves e motivos relacionados co mundo natural que atravesan a cada participante. Sen esquecer a importancia do misterio poético e a procura da precisión e a emoción. Traballaremos así coas coordenadas de tempo e espazo, apoiándonos no territorio e os ciclos para crear textos nos que reflexar unha cartografía íntima e aos mesmo universal.

Dores Tembrás   (Bergondiño, 1979)

Licenciada en Filoloxía Hispánica en 2001, é especialista en literatura Hispanoamericana. En 2008, tras anos de investigación e diferentes estadías en Suecia, Madrid e Buenos Aires defendeu a súa tese doutoral:  La obra poética de Alejandra Pizarnik. Arquitectura de un desencuentro. 

En 2009 publicou o seu primeiro poemario,  O pouso do fume.   A partir dese momento sucédense os traballos poéticos:  Esquiagrafías, Diapositivas a clareo, Silabario e Opium.  En 2013 gañou o Premio de Poesía Concello de Carral coa obra Cronoloxía da urxencia. En 2016 publica a plaquette   Auga a través. E en 2023 sae do prelo o seu último poemario   Enxertos.

O seu primeiro libro de poesía infantil, O peizoque Roque, ve a luz en 2012.

Os seu textos foron traducidos a diversas linguas (vasco, catalán, español, inglés, alemán, ucraíno, croata, búlgaro e estonio) e incluidos en revistas, obras colectivas e antoloxías de difusión internacional.

O seu traballo poético sostense na brevidade e a precisión. A estirpe, a memoria, a infancia e a relación co agro e a natureza configuran un espazo onde o eu poético excava na linguaxe, outorgando ao silencio un lugar de preferencia.

En 2014 funda, xunto á tamén escritora Antía Otero, o proxecto cultural   Apiario,   que se centra en dúas áreas de traballo: unha escola adicada á formación, con cursos de escrita creativa e poética, e outra adicada á edición. Trátase dun proxecto de carácter independente que fai fincapé na importancia do libro como obxecto. O seu catálogo, focalizado en poesía, pretende outorgarlle a cada orixinal entidade individual e por iso o deseño de cada libro responde ás súa propias necesidades. Ao longo desta década conseguen recoñecementos e premios que inciden na excelencia do seu traballo editorial.