Exposición 'Paseos pola natureza' de Lola Zumel na biblioteca verde

A exposición

Esta exposición reúne un total de 20 obras realizadas en diferentes técnicas —acrílico, acuarela, ceras, pigmentos e verniz— nas que a natureza se converte no fío condutor da ollada artística. Cada peza nace da observación pausada e da experiencia dos paseos realizados por distintos lugares, transformando paisaxes, formas, luces e pequenas escenas cotiás en fontes de inspiración e creatividade.

As obras, de grande riqueza visual e cheas de detalle, revelan unha mirada atenta ao pequeno e ao esencial, convidando a descubrir matices, texturas e emocións en cada composición. A través desta diversidade técnica e expresiva, a artista propón un percorrido que conecta experiencia, territorio e creación artística.

Sobre o artista

Lola Zumel (Madrid, 1956) é restauradora de obras de arte e artista plástica. Actualmente reside en Oleiros e conta cunha traxectoria profesional vinculada tanto á conservación do patrimonio histórico como á creación artística contemporánea.

Formouse en debuxo e pintura na Academia Peña de Madrid e posteriormente cursou estudos de Restauración e Conservación de Bens Culturais na Escola Oficial de Restauración. Completou a súa especialización con estudos de restauración e diplomatura na especialidade de pintura, así como con traballos de formación práctica xunto ao restaurador e pintor Santiago Serrano Rueda.

Ao longo de máis de catro décadas participou en importantes proxectos de restauración e conservación en institucións culturais, museos, edificios históricos e coleccións de grande relevancia patrimonial. Entre eles destacan intervencións no Museo Cerralbo, o Casón del Buen Retiro, a Basílica de San Francisco el Grande, o Mosteiro de San Lorenzo de El Escorial, o Mosteiro das Descalzas Reales ou o Mosteiro de San Millán de la Cogolla, entre outros. Tamén desenvolveu traballos para organismos públicos, fundacións e coleccións privadas.

Desde 1999 estivo vinculada á empresa Delicias Restauración, onde participou como técnica e responsable de dirección en numerosos proxectos de conservación do patrimonio artístico.

Paralelamente ao seu labor como restauradora, desenvolveu unha traxectoria artística propia, participando en exposicións individuais e colectivas desde 2004. A súa obra puido verse en espazos culturais de Madrid, Villaviciosa de Odón e Estepona, mostrando unha produción marcada pola sensibilidade cara á materia, á memoria e aos procesos de transformación inherentes tanto á arte como á restauración.

Horario de visita

A exposición 'Paseos pola natureza' poderá visitarse no seguinte   horario:

• Xuño: luns a xoves, de 10 a 14 h. e de 16 a 19 h.; venres de 9  a 14 h.
• Xullo e agosto: luns, de 10 a 14 h. e de 16 a 19 h.; martes a vernes, de 9  a 14 h.