Exposición 'Fauna en extinción' no Centro de Documentación Ambiental

A nosa biblioteca e centro de documentación ambiental acolle na súa sede, as antigas cabalarizas do Pazo de Lóngora, a  exposición 'Fauna en extinción', da artista Teresa Rodríguez Tinaquero,  unha serie de ilustracións orixinais sobre fauna ibérica ameazada. A mostra pode visitarse na pranta baixa da biblioteca   do 18 de setembro ao 30 de novembro de 2023.

A exposición

Segundo a Lista Vermella da Unión Internacional para a Conservación da Natureza, máis de 42.100 especies están ameazadas de extinción. É dicir, o 28 % do total das especies avaliadas no mundo están hoxe en perigo de desaparición, incluíndo o 41% dos anfibios, o 37% de quenllas e raias, o 36% dos corais, o 34% das coníferas, o 27% dos mamíferos e o 13% das aves.  A perda dunha soa especie clave pode ser devastadora para a diversidade dos ecosistemas. 
Esta exposición recolle unha serie de sete ilustracións de diferentes especies de fauna ibérica ameazadas realizados a lápis, entre os que se atopan o oso pardo, a águia real, o quebraósos, o visón europeo, o lince ibérico, a malvasía de cabeza branca, e a pita do monte. Algunhas destas especies como o oso pardo, o lince ibérico, a águia real ou a malvasía, estiveron a piques de desaparecer no noso país, e grazas aos plans de conservación levados a cabo, hoxe en día recuperaron parte das súas poboacións, mais aínda están expostas a numerosas ameazas. 

Sobre a artista

Teresa Rodríguez Tinaquero reúne nesta exposición dúas das súas paixóns: o debuxo e os animais. De pequena quería ser debuxante, veterinaria e patinadora á vez. Licenciada en Ciencias do Mar, nunca  deixou a ilustración (nen os patíns), e desta  afición naceu esta mostra que recolle animais en perigo de extinción, sen ter moi clara a finalidade que lle daría aos debuxos. Como usuaria e lectora da biblioteca do CEIDA, hoxe expón a súa obra no Pazo de Lóngora cun obxectivo claro: a concienciación polo respeto e coidado da natureza. 

A exposición 'Fauna en extinción' pode visitarse en   horario de luns a xoves, de 10 a 14 h. e de 16 a 19 h., e venres de 9 a 14 h.