Exposición «O que vexo» de Mavi Lezcano González na Biblioteca Verde

A Biblioteca Verde do CEIDA acolle a exposición   «O que vexo»,  da artista ourensá   Mavi Lezcano González,  unha mostra composta por arredor de dez obras de pequeno formato realizadas en pintura acrílica.

Nelas, a artista achega a súa particular ollada sobre a contorna que a rodea, tomando como fonte de inspiración a natureza, o mar, a paisaxe e os pequenos recunchos e detalles da vida cotiá que espertan a súa atención. A través da pintura, Mavi Lezcano procura compartir esa forma persoal de observar, interpretar e representar lo que ve.

Sobre o artista

Mavi Lezcano González   (Ourense, 1968) pinta desde nena e foi construíndo a súa mirada artística ao longo dos anos, tanto a través dos seus estudos de Historia da Arte como da aprendizaxe xunto a diferentes pintores e pintoras, entre eles Segura Torrella, Montserrat Juárez, Charo Santiago e Xavier Muíños.

Ao longo da súa traxectoria participou en diversos certames artísticos, nos que a súa obra foi premiada e seleccionada, así como en exposicións individuais e colectivas celebradas en distintos espazos de Galicia.

Horario de visita

«O que vexo» poderá visitarse na Biblioteca Verde do CEIDA  no seguinte   horario: 

• Luns: de 10 a 14 h. e de 16 a 19 h.
• Martes a vernes: de 9  a 14 h.