Presentación do libro ‘Los años de guerra y la prisión provincial de A Coruña. Memorias de un recluso: Domingo Quiroga Ríos’ do historiador Luís Lamela

O vindeiro   xoves, 10 de outubro,  a  Asociación para a Recuperación da Memoria Histórica (ARMH),  presenta o libro  ‘Los años de guerra y la prisión provincial de A Coruña. Memorias de un recluso: Domingo Quiroga Ríos',  na nosa biblioteca e centro de documentación ambiental. O acto terá lugar nas  antigas cabalarizas do Pazo de Lóngora ás 19 h.   e participarán no mesmo:

• O historiador e escritor  Lúis Lamela,  coordinador das memorias.
• Carlos Vales,  director do CEIDA.
• Carmen Rodeja,  voceira da ARMH e creadora do blogue  memoriadocarcere.com

As memorias de Domingo Quiroga -até agora inéditas- son exemplar testemuño dun relato real sobre a historia máis triste; un acto político tamén, que é deixar falar a quen xa non pode falar: ao preso republicano e masón Domingo Quiroga Ríos, que conta o que reflectiu o seu espello da sórdida realidade que viviu encerrado na prisión provincial coruñesa durante a Guerra Civil e parte da posguerra.

A través do fillo de Domingo Quiroga Ríos, Héctor Quiroga, estas memorias chegaron ás mans do investigador Luís Lamela, quen lle deu corpo para poder chegar ás mans de lectores e lectoras. A edición do libro corre a cargo da Asociación para a Recuperación da Memoria Histórica (ARMH).

‘Domingo Quiroga Ríos’

Domingo Quiroga (que da nome ao centro de documentación do CEIDA) padeceu  unha dura represión durante o franquismo pola súa ideoloxía republicana e a súa militancia masónica. Naceu na Coruña o 27 de xuño de 1900, e emigrou a Estados Unidos, México e  Cuba onde fundou a Alianza Republicana Española. Volveu a Galicia en 1930  para traballar no diario coruñés, “O Noroeste”, e iniciou a súa colaboración con artigos en “La Voz de Galicia”.

Politicamente Domingo Quiroga estivo primeiro afiliado ao Partido Socialista, pasando despois ao Partido Republicano Radical-Socialista e finalmente, en marzo de 1935, ao de Unión Republicana. Igualmente, integrouse na logia masónica herculina “Pensamento e Acción número 11”, chegando a ser o seu presidente.

Tamén foi socio e membro da xunta de goberno do  Circo de Artesáns,  membro das “Irmandades dá Fala” e socio da “Liga dos Dereitos do Home”.

Ante o  golpe de estado de xullo de 1936, traballou de auxiliar administrativo da Mariña civil na Coruña, e en xuño do devandito ano solicitou ser  trasladado a Noia. Alí, a raíz do golpe de estado, foi suspendido de emprego e soldo e inhabilitado para calquera traballo público. Uns meses despois da sublevación militar, foi detido e encarcerado durante preto de dous anos na prisión provincial coruñesa. Durante esta estancia escribiu o relato emocionante do sucedido dentro dos muros.  E á saída do cárcere, exiliouse en Cuba e logrou sobrevivir especializándose en temas do mar e da pesca, escribindo artigos e impartindo conferencias e charlas, tanto de temática pesqueira e marisqueo, como de aspectos históricos ou ambientais.

Volveu a Coruña e de 1948 a 1955 traballou como secretario técnico na Cooperativa do Mar de Buques de Pesca da Coruña. Tres anos despois, a Real Academia Galega nomeoulle correspondente. No ano 1955 foi nomeado oficial de pesca pola FAO (Organización das Nacións Unidas para a Alimentación e a Agricultura) e destinado ao Salvador, Cuba,  Ecuador e Roma.

Mentres tanto seguiu publicando en "La Voz de Galicia" temas pesqueiros e tamén sociais, históricos, patrimoniais, culturais ou ambientais. En xullo de 1961 editouse o seu libro, “A pesca de arrastre en Galicia e os seus problemas”. En 1968, de novo na Coruña, seguiu colaborando en medios de comunicación e revistas especializadas da época, impartindo numerosas charlas e conferencias e converténdose nun dos grandes expertos en materia pesqueira.

En  xullo de 1973 foille concedido o XV premio Fernández Latorre e un ano despois, en 1974 colaborou na fundación de ADEGA  -Asociación Para a Defensa Ecolóxica de Galicia-, da que foi o seu primeiro presidente, asociación pioneira na defensa do medio ambiente en Galicia. En 1983 outorgáronlle a medalla ao mérito social marítimo do ISM.

Domingo Quiroga Ríos faleceu o 4 de outubro de 1991 na Coruña.

O libro 

“Os anos de guerra e a prisión provincial da Coruña. Memorias dun recluso: Domingo Quiroga Ríos”,  ten como principal protagonista ao propio Domingo Quiroga, pero tamén a un trío de mozos que con el coincidiron nas celas da prisión: José Díaz Edreira, Enrique Pérez Martínez e Eduardo Torrón Cabezas, individuos encerrados nun cárcere na que a morte non acababa nunca e desde onde escoitaban descargas de fusilería e tiros de graza; illados. Alí, naquel amurallado cárcere, próxima á Torre de Hércules, permaneceron encerrados máis de cincocentos presos políticos.

Neste pequeno volume atoparemos a puñada testemuñal do paso de Domingo Quiroga. Os sucesos contados de primeira man e a emoción con que o contextualiza o experto Luís Lamela, farán que a lectura cobre unha forza extraordinaria.

Luís Lamela

Luís Lamela é un investigador da Historia recente de Galicia. Nado en Corcubión, despois de estudar na Escola Oficial de Náutica, traballou algún tempo na Mariña Mercante, pero moi pronto pasou ao sector financeiro. Reside na Coruña.

Desde hai máis de 30 anos é un investigador incansable sobre a represión franquista en Galicia e un dos pioneiros neste labor. Xa desde os anos oitenta do pasado século, colaborou en numerosas publicacións divulgando os nomes e biografías dos represaliados e do acaecido aos republicanos galegos. Na súa bibliografía ten numerosas obras de referencia en relación coa guerrilla antifranquista, como, “Foucellas. O rigoroso relato dunha loita antifranquista” ou “A loita dos perdedores”; e tamén sobre personaxes republicanos galegos como José Miñones, Alexandro Bóvedaou  Telmo Bernández, as autoridades coruñesas represaliadas e sobre a represión en diversos  lugares de Galicia.

Tamén investigou e recuperou numerosa documentación inédita e foi un historiador fundamental para moitos dos traballos de investigación.

Como o aforo é limitado, agradecemos confirmar asistencia no seguinte     FORMULARIO   ou no teléfono 981 630 618.