Programa 'Para unha Transición Ecolóxica': Formación do Profesorado

O CEIDA, co apoio da Deputación da Coruña e a través do programa “Para unha Transición Ecolóxica”, pon en marcha un programa formativo para profesorado coa finalidade de achegar información e coñecemento sobre as problemáticas ambientais actuais de maior envergadura, así como da importancia dos nosos espazos naturais protexidos de cara ó seu coñecemento e conservación, proporcionando recursos que lle sirvan para tratar as temáticas na aula.

Somos conscientes de que na actual sociedade que estamos a vivir o eido ambiental cada vez corre máis risco e, por tanto, tamén é obxectivo dunha consideración maior, tanto a nivel social xeral como na educación formal a todos os niveis. É por iso que consideramos que estas actividades poden resultar útiles para o persoal docente que terá que traballar nalgún momento sobre temas ambientais vencelladas ao currículo escolar e aos contidos dos diferentes cursos académicos.

A finalidade das actividades é tamén que o profesorado sexa protagonista e poña en valor as súas dúbidas, preguntas, experiencias, ideas, inquietudes e cuestións de calquera tipo en relación ás temáticas traballadas.

O programa formativo abarcará as catro liñas do programa 'Para unha Transición Ecolóxica':

• Os espazos naturais protexidos.
• A emerxencia climática.
• O lixo mariño.
• A soberanía alimentaria.

As catro actividades son independentes entre si, podéndose anotar a unha, a todas, ou a varias diferentes. 

Está dirixido principalmente ao profesorado de Educación Primaria, Educación Secundaria Obrigatoria, Bacharelato e Formación Profesional da rama científica, aínda que tamén poderá inscribirse o persoal docente doutras ramas.

Como as prazas son limitadas, terá prioridade o profesorado da provincia da Coruña.