Curso Escola a Ceo Aberto: Ferramentas didácticas para naturalizar o currículo e fomentar o vínculo coa natureza

Cun enfoque eminentemente práctico e vivencial, este curso achegará ferramentas didácticas e metodolóxicas que fomentan a reconexión coa natureza, así como a naturalización do currículo e a vida escolar. Traballaranse dinámicas e actividades para favorecer o vínculo afectivo coa natureza e coa contorna próxima; así como actividades didácticas para desenvolver, ao aire libre, contidos curriculares de calquera materia, que fagan posible unha Escola a Ceo Aberto. Tamén haberá un tempo para profundar nas bases metodolóxicas e conceptuais, que sustentan as propostas pedagóxicas vivenciadas, así como a elaboración dun caso práctico para aplicar ao contexto educativo do alumnado participante.

A finalidade principal é, por tanto, motivar, capacitar e empoderar ao profesorado participante para que favoreza o vínculo afectivo do seu alumnado coa súa contorna (e o seu propio) e desenvolva regularmente a súa actividade docente ao aire libre. De maneira que goce dos beneficios do contacto coa natureza para a saúde, o benestar, o desenvolvemento persoal e os procesos de aprendizaxe; así como para o desenvolvemento de actitudes e comportamentos proambientales e da topofilia cara ao seu territorio próximo.

Entre os contidos do curso destacan:

• Dinámicas e xogos  na natureza baseados na   Aprendizaxe Fluída  para xerar conexión afectiva e experiencia vivencial.
• Actividades curriculares ao aire libre  adaptadas a distintas áreas de coñecemento.
• Beneficios do contacto coa natureza  na saúde, benestar e aprendizaxe. Introdución ao   trastorno por déficit de natureza.
• O xogo, a percepción sensorial, o mindfulness e outras prácticas como   técnicas de educación ambiental.
• Recomendacións didácticas  para integrar a natureza no currículo formal e fomentar o sentido de pertenza ao territorio (topofilia).

Docentes de calquera ámbito e nivel educativo (Infantil, Primaria, Secundaria, Formación Profesional, Universidade e educación de persoas adultas), profesionais da educación ambiental, acompañantes de escolas na natureza, ou público xeral interesado na educación ao aire libre.