Conferencia 'Eclipses ao longo da historia: medo, mito e ciencia' con Juan Nolasco

A eclipse solar do 12 de agosto de 2026 será un dos fenómenos astronómicos máis salientables dos próximos anos en toda a Península Ibérica. A partir deste acontecemento excepcional, esta conferencia propón unha viaxe a través do tempo para descubrir a historia das eclipses e a fascinación que espertaron nas diferentes civilizacións ao longo dos séculos.

Explorarase como distintas culturas interpretaron estes fenómenos entre o medo, o mito e a relixión, e como a observación e o desenvolvemento da ciencia permitiron comprender a súa verdadeira natureza. Ademais, analizaranse algúns dos episodios históricos máis relevantes relacionados coas eclipses e o seu papel no avance do coñecemento astronómico.

A sesión tamén abordará a presenza das eclipses na arte, na literatura e na cultura popular, mostrando como inspiraron relatos, lendas, obras artísticas e reflexións filosóficas. Finalmente, ofreceranse explicacións sinxelas sobre o fenómeno que terá lugar en agosto de 2026, así como a importancia de observar este fenómeno de forma informada, consciente e segura.

Juan Nolasco

Juan Nolasco traballa no Planetário do Porto – Centro Ciência Viva, en Portugal, e desenvolve proxectos de divulgación científica e educación espacial. É profesor e enxeñeiro, con experiencia en iniciativas educativas da ESA, a NASA e outros programas internacionais, especialmente en astronomía, tecnoloxía e educación STEAM.

Data e lugar

Martes, 30 de xuño, 19 horas.
Biblioteca e centro de documentación ambiental do CEIDA. Antigas cabalarizas do Pazo de Lóngora (Liáns, Oleiros)

Inscrición

A actividade é gratuita.
Inscrición previa a través do formulario habilitado ou no teléfono 981 630 618