Contacontos 'Xela, aventura na fraga'

A nosa biblioteca e centro de documentación ambiental acolle a segunda entrega de Xela, a protagonista dun conto que prentede achegar a natureza do noso territorio á infancia, creado pola educadora ambiental e contadora de historias   Inma Soto.  Esta segunda historia leva o título de   'Xela, aventura na fraga',   unha oportunidade para mergullarse no bosque galego e despertar a sensibilidade, o apego hacia o mundo que nos rodea. 

O contacontos terá lugar no xardín do   Pazo de Lóngora   o vindeiro   sábado,  28 de xuño,   ás   12 horas,   e terá unha duración aproximada de   hora e cuarto.   Está dirixido a   nenos e nenas a partir de 4 anos,   que poderán asistir acompañados de pais/nais ou outros familiares. 

Sinopse:   Xela amosa a paisaxe que pode ver dende a fiestra do seu cuarto, o bosque autóctono galego, que todos coñecemos como a fraga. Un inesperado e intrigante suceso motiva á protagonista a saír na procura de respostas. Polo camiño atopa rastros e pegadas de animais que conducen á resolución deste misterioso caso. Que pasará nesta aventura?

Inma Soto,  autora e mediadora:  dirixida polo entusiasmo dun corazón aventureiro, estudou Ciencias Mariñas en Vigo, completando a súa capactitación co ciclo de manexo forestal e o entorno natural en Xinzo da Limia. Traballou en diferentes proxectos, sempre vinculados á difusión e conservación da natureza. As historias naceron para crear conciencia sobre a protección e o respecto polo medio natural e o patrimonio que nos rodea. Hoxe, os contos e as historias son unha das formas que ela atopa para comunicarse, de aí que se especializase neste campo e crease o proxecto de Xela, para viaxar a través da palabra a mundos de diferentes cores e, ao regreso, recoñecer mellor o noso universo.

As prazas son limitadas, polo que é   imprescindible a reserva de praza   no teléfono 981 630 618 ou no seguinte formulario