Novas maletas viaxeiras: a maleta climática

Co obxectivo de que o alumnado dos centros educativos comprenda a problemática do cambio climático e da crise global, coñeza os escenarios de futuro que podemos atopar se non comezamos a actuar de contado, así como as ferramentas que a cidadanía posúe para mitigalo, a biblioteca e centro de documentación do CEIDA acaba de lanzar unha nova colección de maletas viaxerias: as maletas climáticas. Están dirixidas ao estudantado de 2º e 3º ciclo de primaria, aínda que pola complexidade da materia, algúns dos recursos que recolle a maleta poden ser adaptados a secundaria.

As maletas climáticas forman parte do programa ‘Por unha Transición Ecolóxica’ que o CEIDA desenvolve co apoio da Deputación da Coruña, e apoian os Obxectivos número 7 (Enerxía asequible e non contaminante), 11 (Cidades e Comunidades Sostibles), 12 (Produción e Consumo responsables) e 13 (Acción polo Clima) dos Obxectivos de Desenvolvemento Sostible para o ano 2030 (Axenda 2030). 

Con estas xa son catro as temáticas que o centro de documentación ofrece a todos os centros educativos galegos dentro do programa de maletas viaxeiras, que son cedidas de forma temporal e totalmente gratuita a todos os centros solicitantes. Máis información sobre este programa:
http://www.ceida.org/gl/biblioteca-e-documentacion/maletas-viaxeiras