Pradeiras Mariñas, tesouros de biodiversidade (proxecto ZOSTERA)

As pradeiras de fanerógamas mariñas teñen unha elevada importancia ecolóxica, xa que proporcionan numerosas vantaxes na súa contorna. Desgraciadamente, os impactos aos que se ven sometidas provocan a diminución da súa extensión, motivo polo cal é preciso afondar no seu seguimento, protección e coñecemento.

Estas pradeiras, ou sebadais, proporcionan alimento, refuxio e hábitat de cría adecuados para un gran número de organismos que as empregan para reproducirse e evitar a depredación, o que nos fala da súa función como “viveiros” naturais. Moitas destas especies dependentes das pradeiras mariñas son explotadas comercialmente polas pesquerías, o que unido á súa función como estabilizadoras das praias e da costa contra a erosión mariña, osixenación e contribución á transparencia das augas, fixación de areas, etc., confírelles unha enorme importancia para o ser humano. Malia iso, son altamente descoñecidas e incluso consideradas en moitas ocasións “malas herbas”.

Con este programa educativo, o CEIDA pretende divulgar entre o alumnado a biodiversidade da súa contorna máis próxima e a súa importancia para o seu benestar, en gran parte descoñecida para eles, así como a importancia ecolóxica das pradeiras mariñas.

• Charla divulgativa sobre pradeiras mariñas. Charla/obradoiro con un marcado carácter participativo e dinámico sobre as pradeiras mariñas, adaptada ao nivel do alumnado, cos seguintes contidos:
  • Que son as pradeiras mariñas e as diferencias principais coas algas.
  • A importancia das pradeiras mariñas nos ecosistemas costeiros.
  • Para que nos sirven as pradeiras mariñas?
  • Actividades que poñen en risco o seu bo estado de conservación.
  • As pradeiras mariñas da comarca na que se sitúa o centro escolar.

                 Ademais incidirase especialmente no concepto de “servizos ecosistémicos”, adaptándoo á idade do alumnado e dando a coñecer a importancia das pradeiras para o desenvolvemento e o benestar do territorio e sociedade locais.

• Seguimento científico en pradeiras intermareais. Ademáis da charla incluída na actividade anterior, unha serie de centros educativos próximos a pradeiras mariñas accesibles para o alumnado participan nun seguimento científico da pradeira da súa localidade, realizando visitas de campo para toma de datos sobre características da propia pradeira e as especies de Zostera presentes (altura media, densidade de feixes, cobertura, idade, etc.), especies de fauna e flora complementarias, estado de conservación, impactos detectados, entre outras. Mediante o desenvolvemento dun proxecto educativo ao longo do curso, o alumnado adquirirá coñecementos sobre este valioso ecosistema ao tempo que se introduce nas metodoloxías, linguaxe e cultura científica propia deste tipo de traballos de campo.

• Congreso escolar. No derradeiro trimestre do curso o CEIDA organizará un Congreso Escolar, en sede aínda por determinar, como xornada lúdico-académica na que os distintos centros participantes reuniranse e presentarán os resultados do seu proxecto ao resto de participantes, ao modo dun Congreso científico.