A Mar Asoballada

Os colectivos RetoqueRetro e Mar de Fábula, xunto a Ars Ciencia únense este 2019 para crear a exposición 'A mar asoballada'. Tres colectivos artísticos diferentes e ao tempo complementarios que, respondendo á súa chamada, integran nas súas obras, nunha íntima e paciente tarefa, as crebas e o lixo mariño que retiran da ribeira.

O equipo artístico de RetoqueRetro, seguindo a ancestral tradición galega de recoller tesouros procedentes de naufraxios e lugares lonxanos que o mar deposita nas praias, fan das crebas a sua peza estrela. Madeiras preesculpidas polas mareas e a intemperie e que eles rematan dándolles a forma que lles suxiren: barcos e peixes, faros e sereas, bosques e dragóns, seres mitolóxicos, zooides e humanoides...

Mar de Fábula fai do lixo mariño o alicerce da súa obra: animais fantásticos de todas as formas e tamaños, con vísceras circulares e grandes ollos abraiados. Peixes, vermes, libeliñas, arañas e formigas, criaturas caóticas, monstruosas pero inofensivas, xurdindo dos fondos abisais e sumidas no desconcerto porque saben que, en circunstancias normais, non deberan de existir porque todas elas teñen os seus corpos de plástico.

Ars Ciencia, coa súa mostra Mare Plasticum, combina nos seus traballos artísticos a reciclaxe, a sustentabilidade, o medio ambiente, a ciencia e a arte. Nas súas obras, realizadas con plásticos recollidos nas praias de Galicia, podemos atopar redes, flotadores, bolsas, cebos, zapatos, xoguetes, botellas...

Esta exposición é unha proposta conxunta de concienciación ambiental e fonte de inspiración que debera levarnos a un necesario replantexamento de relacións entre a sociedade actual e o mar. Toda a obra incorpora os residuos que o mar nos devolve con maior intensidade: O lixo – principalmente os plásticos- procedentes da descontrolada actividade humana. O lixo que se atopa nas praias é soamente a punta do iceberg da que seguramente sexa a meirande problemática ambiental que os humanos, os causantes, non queremos mirar...

• RetoqueRetro

RetoqueRetro nace como unha proposta de obradoiro de restauración e reciclaxe, baixo a necesidade de reinventar un oficio, a restauración, con preceptos de reciclaxe, sustentabilidade e ecoloxía. O seu equipo artístico, Javi Serantes, Isa G e Ana Lee, colaboran aunando os seus diversos coñecementos e experiencias para a creación de pezas únicas e dispares, sempre con materiais procedentes 100% da reciclaxe. Bricolaxe, restauración, escultura, pintura... cada quen ten a súa visión, método e estilo, pero todas as obras están impregnadas das opinións e aportacións do equipo, o cal enriquece o resultado final da obra e a rende única. Na súa traxectoria de catro anos experimentando xuntos, traballaron sempre con madeiras recuperadas como soporte, dende mobles abandoados recollidos nos contenedores, ata sarmientos ou paus de viña recollidos na vendimia.

• Mar de Fábula   (www.mardefabula.org)

Mar de Fábula é unha asociación sen ánimo de lucro que ten por obxectivo limpar o mar. Para este fin, promove a recollida e retirada de todos os refugallos sólidos depositados na beiramar, xa sexa polos temporais, polas correntes mariñas ou polos verquidos procedentes de terra, para evitar que volten ao mar. Un dos principais destinos que dan a estos refugallos plásticos é o traballo de creación artística e artesanal con exposición permanente, moitos deles recollidos na mostra do CEIDA.

• Ars Ciencia (Mare Plasticum)   (http://www.arsciencia.org)

Ars Ciencia e a súa exposición Mare Plasticum versa sobre a contaminación do mar por plástico e as súas consecuencias ambientais, e é froito da colaboración entre Margarita Cimadevila e Wolfgang Trettnak, artistas con formación científica. O seu obxectivo é mostrar, a través das súas obras, a problemática do lixo mariño e sensibilizar ao público, especialmente aos xoves, e educalo no respecto ao medio ambiente.