Encontro coa oceanógrafa Débora Iglesias

Os desafíos aos que se enfrontan os nosos océanos e os efectos que neles producen as actividades humanas será o tema que abordará a oceanógrafa viguesa e catedrática da Universidade de California, Débora Iglesias, na súa visita ao CEIDA. A investigadora, referente internacional no estudo da diversidade e a función do fitoplancton mariño, presentará na nosa sede o seu libro, 'The Future of Marine Life in a Changing Ocean', no que resume tres décadas de coñecemento sobre o medio mariño, coas súas ameazas, variacións na diversidade dos ecosistemas e, incluso, unha análise do custo do cambio climático na seguridade alimentaria. 

A investigación da científica galega e do seu equipo intenta responder a preguntas cruciais nun contexto de cambio climático e a súa incidencia directa nos ecosistemas mariños. Cambios recentes na química mariña como a acidificación dos océanos, a diminución dos niveis de osíxeno, o quentamento dos océanos ou a contaminación mariña, son algúns exemplos de cambios na diversidade destes ecosistemas, abordados na obra de Débora. O libro proporciona unha base científica para estudar este cambio ambiental, así como un marco científico para abordar políticas, leis mariñas e a economía do cambio climático.

Máis información:

• Entrevista de Débora Iglesias na Voz de Galicia:  https://www.lavozdegalicia.es/noticia/faigaliciaverde/2019/10/23/problema-paises-sentimiento-urgencia-pesar-estado-deplorable-medio-marino/00031571829603169493820.htm