I Congreso de Educación Ambiental sobre Compostaxe para Centros de Ensino da Provincia de Pontevedra

O CEIDA ven desenvolvendo Congresos Escolares de distintas temáticas dende o ano 2007. Os congresos escolares foron concibidos, dende un primeiro momento, co obxectivo de brindar aos centros educativos un espazo de intercambio de experiencias e punto de encontro, ao tempo, que incentivar a novos centros a que traballen na conservación e divulgación do medio natural. Así mesmo, desde as primeiras edicións, búscase dar protagonismo ao alumnado para que sexa o voceiro da realidade ambiental do seu ámbito máis próximo.

Así, este I Congreso de Educación Ambiental para os centros de ensino da provincia de Pontevedra nace co fin de fomentar na sociedade a necesidade de colaborar na redución e correcta separación do lixo doméstico, canalizando as mensaxes que os rapaces e rapazas da provincia de Pontevedra farán a través dos seus proxectos de investigación.

Os obxectivos desta actividade son:

• Consolidar o Congreso como un espazo de participación e debate, destacando o papel dos centros educativos como difusores dunha nova cultura ambiental mais sustentable na sociedade.
• Intercambiar experiencias e aprendizaxes entre alumnado e profesorado entorno á compostaxe, que promovan un cambio de actitudes e de responsabilidade na separación dos residuos orgánicos domésticos.