Objetivo Ferrol 2.0

A exposición 'Objetivo Ferrol 2.0', da Asociación Cultural, Recreativa e Deportiva Grupo Bazán (http://grupobazan.es), escolle a comarca de Ferrol para facer unha exposición conxunta de 40 fotografías. 2.0, ademáis de formar parte do título da mostra, para os amantes da fotografía tamén ten un significado importante: a apertura de diafragma nos obxectivos.

Nesta exposición, á vez que se vai seguindo un percorrido pola cidade e arredores, o espectador irá vendo fotos das Meninas de Canido, pasando pola praza de Amboaxe nun día de xogos, a Praza de Armas reflicte o seu esplendor ante a atónita ollada duns manequíns e a Rúa Galiano a súa vida cotiá. Continúase o percorrido pola Praza de Galicia onde o Jofre non deixa de sorprendernos coas súas fotos nocturnas, así como o edificio de Correos, o Monumento aos Caídos ou a casa Romeu. Achegámonos ata o Porto onde se pon o sol, e uns fermosos reflexos móstrannos Curuxeiras. Dentro do Arsenal destaca o dique, e continuando ata Esteiro facémoslle oco á Porta do Estaleiro, os guindastres de Navantia e un buque en construción. A andaina achéganos ao paseo de Caranza para alí tomar rumbo ao Castelo de San Felipe, e de aí ás praias e á súa natureza.

• Grupo Bazán

A Sección de Fotografía do Grupo Bazán formouse en 1.994 consolidándose en pouco tempo e alcanzando grandes logros. A inquietude por esta disciplina reúne a un grupo de persoas cuxa ilusión é compartir e ampliar coñecementos. Pasado o tempo, coa chegada das cámaras dixitais, un maior número de persoas desperta o interese pola fotografía, e é no 2.008 cando conta cunha maior afluencia de socios, pasando de 12 no ano 1.994 a 57 no 2.011. Máis información sobre a súa actividade en:
http://fotografiagrupobazan.blogspot.com - fotografiagrupobazan@gmail.com