VI Congreso de Educación Ambiental dos Centros de Ensino da Coruña

O CEIDA, Centro de Extensión Universitaria e Divulgación Ambiental de Galicia, como punto de referencia para a educación ambiental na comunidade galega, quere potenciar e difundir actitudes, comportamentos e prácticas sociais que axuden a acadar a sustentabilidade ambiental na nosa sociedade. Con diferentes actividades de carácter formativo, divulgativo e informativo pretende chegar a un amplo abano de destinatarios entre os que se encontran a comunidade escolar.

Entre as súas liñas prioritarias de traballo atópase a posta en valor do patrimonio natural galego e a concienciación sobre a necesidade de protexelo e conservalo. Deste xeito xurde o VI Congreso de Educación Ambiental “Espazos para Conservar. Defendamos o noso Patrimonio Natural”, co fin de despertar a sensibilidade ambiental entre os máis novos, e que se celebrou o 24 de maio de 2012 no Castelo de Santa Cruz (Oleiros).

Entre sos seus obxectivos, destacan: 

• Incentivar a realización de proxectos de educación ambiental que brinden ao alumnado e a toda a comunidade educativa a posibilidade de descubrir e valorar o Patrimonio Natural de Galicia
• Promover unha rede de centros de ensino que desenvolvan proxectos de educación ambiental a prol da conservación do patrimonio natural galego
• Consolidar o Congreso como un espazo de participación e debate, reforzando o papel dos centros educativos como difusores dunha nova cultura ambiental na sociedade
• Consolidar vías de comunicación e de colaboración entre os centros de ensino e o CEIDA.