Esencia Salvaxe

O olfacto ten unha relación moi especial coas nosas emocións e coa memoria. É o sentido que está máis directamente conectado con zonas do cerebro relacionadas con sentir e lembrar. Por iso, ás veces, un aroma pode levarnos directamente a un recordo antes mesmo de sermos capaces de identificar o que estamos ulindo. Pode devolvernos unha paisaxe, unha persoa, un momento ou unha emoción. Pode sorprendernos, espertar a curiosidade ou facer aparecer unha historia que permanecía agochada na memoria.

E nesa capacidade dos aromas para evocar e transportarnos nace   Esencia Salvaxe: experiencia sensorial entre aromas, literatura e natureza.

Durante a actividade, diferentes aromas relacionados coa natureza van guiando unha experiencia na que sentir, lembrar e compartir son parte da viaxe. As sensacións e evocacións que xurden atopan tamén un lugar nas palabras, a través da lectura en voz alta de textos seleccionados para dialogar cos sentidos.

Esencia Salvaxe é, así, un convite a experimentar a natureza doutra maneira: a través do olfacto, da literatura e das historias que cada persoa leva consigo.

A actividade estreouse en setembro de 2026 como unha experiencia piloto. A estupenda acollida por parte das persoas participantes e o interese que suscitou confirmaron o potencial desta proposta para achegarse á natureza desde unha perspectiva diferente, sensorial e literaria.

Por iso, Esencia Salvaxe pasou a incorporarse ao programa xeral de actividades da Biblioteca Verde do CEIDA, como unha nova proposta para explorar a relación entre natureza, sentidos, memoria e literatura.

Esencia salvaxe en imaxes